Vekas viktigaste: Ukraina-forhandling, IA-avtale og søksmål mot Noreg

Amnesty saksøker Noreg

Amnesty Norge saksøker staten for diskriminerande praksis hjå politiet, skriv NRK. Dei saksøker saman med Awon Amidu frå Trondheim som ifølgje organisasjonen har blitt diskriminert og trakassert i fleire år av politiet i Trøndelag.

Amidu har klaga og politimeldt politiet for å ha følgt etter han og gjennomført fleire kontrollar enn naudsynt. Diskrimineringsnemnda slår fast at politidistriktet har diskriminert mot Amidu på grunn av etnisitet, men ikkje at dei har trakassert han.

Amnesty og Amidu meiner politiet ikkje har følgt opp saka godt nok, og det er difor dei går til sak mot justisdepartementet.

Ny IA-avtale på plass

Onsdag vart LO og NHO samde om ein ny inkluderande arbeidslivsavtale (IA-avtale), skriv VG. Dei har forhandla over avtalen i fleire månader.

Avtalen skal vare i fire år, og hovudkonflikten har vore om sjukelønnsordninga for arbeidstakarar skulle vernast fullstendig for dei fire neste åra, slik LO vil.

IA-avtalen vart innført i 2001 med mål om å få ned sjukefråværet og opp sysselsetjinga. Sidan då har han blitt forhandla på nytt fleire gongar, men sjukelønnsordninga har vore skjerma.

Ifølgje den nye avtalen skal dei bruke i år og neste år på å samle inn informasjon. I 2027 og 2028 skal dei bruke denne informasjonen for å setje i gang tiltak som skal få ned sjukefråværet.

Lyspunkt: Framandarbeidarar frigjort i Myanmar

Over 250 personar frå 20 forskjellige land har blitt sleppt fri i delstaten Kayin i Myanmar, skriv BBC. Personane arbeidde i ulovlege telefonsenter som tente pengar på svindlar.

Det er fleire slike telefonsenter langs grensa til Thailand, og sjølv om nokre arbeidarar er der frivillig, blir mange halde som gissel til familien deira kan betale løysepengar. Arbeidarane er frå forskjellige asiatiske og afrikanske land, dei fleste frå Etiopia.

Dei er frakta til Thailand, som undersøker om personane er offer for menneskehandel. Myanmarske styresmakter har lite kontroll over Kayin-regionen, og det var den uavhengige væpna gruppa DKBA som overførte arbeidarane til den thailandske hæren.