Vekas viktigaste: Skuleskyting, ny regjering og handelskrig

Åtte nye statsrådar i regjering

Etter at Senterpartiet trekte seg frå regjeringa førre veke, presenterte statsminister Jonas Gahr Støre dei åtte nye statsrådane tysdag. Med det har Noreg ei eittpartiregjering med Arbeidarpartiet for fyrste gong sidan Stoltenberg-regjeringa i 2001.

Dei nye statsrådane er:

• Jens Stoltenberg, finansminister
• Tore O. Sandvik, forsvarsminister
• Astri Aas Hansen, justisminister
• Nils Kristen Sandtrøen, landbruks- og matminister
• Lene Vågslid, barne- og familieminister
• Sigrun Gjerløw Aasland, forskings- og høgare utdanningsminister
• Åsmund Aukrust, utviklingsminister
• Kjersti Stenseng, kommunal- og distriktsminister

Etter at Senterpartiet gjekk ut av regjering har både dei og Arbeidarpartiet gått opp på meiningsmålingane.

17 barn døde i skulebrann i Nigeria

Ein islamsk skule i det nordlege Nigeria brann ned tysdag. Minst 17 av elevane døydde i brannen, ifølgje BBC. Fleire elevar er sende til helsesenter i byen Kauran Namoda for å få behandla brannskadar.

Styresmaktene trur skulen hadde rundt hundre elevar mellom 10 og 16 år. Dei meiner brannen starta i eit nabobygg, og spreidde seg til skulen medan barna sov.

På grunn av tronge gater var det vanskeleg å kome fram til brannen og det var allereie store brannskadar då brann- og helsepersonell kom til staden. Dei lokale styresmaktene seier dei skal inspisere andre lokale islamske skular i område for å hindre liknande hendingar.

Lyspunkt: Færre veks opp i barnefattigdom

Frå 2021 til 2023 var det 6400 færre barn som vaks opp i familiar med låg inntekt i Noreg, samanlikna med perioden 2020 til 2022. Det viser nye tal frå Statistisk sentralbyrå (SSB).

Det er særleg småbarnsfamiliane som har hatt best utvikling, noko SSB meiner kan kome av auka barnetrygd.

Noko av nedgangen kan også kome av at det vart født færre barn i perioden.